హిరణ్య వర్ణా (సూర్య స్తుతి)
హిరణ్య వర్ణా (సూర్య స్తుతి)
https://ajaraamarasukthi.blogspot.com/2025/08/ll-ll-ll-ll-ll-ll.html
హిరణ్యవర్ణా హితకర హేళీ
హేమంతాంగణ హేల వయాళి
ధ్వాంతధ్వంస దయామయ విరళి
నమామి దినకర నవకరావళీ llహిరణ్యll
జగతీద్యుమణీ జనహిత సరణి
ప్రభాత అరుణీ ప్రదీప ధారుణి
ద్యుతిమయ క్రేణి దుర్జన అరణి
విదిత ప్రభామణి వేదశిరోమణి llహిరణ్యll
జగన్నాయకా జనహిత దాయక
గోగణ ధారక కుటిల విదారక
నిరత ప్రకాశక నిదాఘ కారక
నిత్యారోగ్య నితాంత ప్రదాయక llహిరణ్యll
బంగారు ఛాయ గలిగినవాడా! హితమును కూర్చు హేళి అనగా సూర్య దేవుడా! ధ్వాంతము అనగా అంధకారమును పటాపంచలు చేసే విరళి అనగా విస్తారమైన దయ కలిగినవాడా, దినమునకు కారణమైన సరికొత్త కాంతి పుంజమును భూమిపై ప్రతి రోజూ ప్రసరింపజేయువాడా!నమస్సులు స్వామీ.
ఈ సకల చరాచర భూయిష్టమగు జగత్తునకు వెలుగునొసగే ఆకాశ రత్నమా!ప్రజా శ్రేయస్సే నీ సరణి, అనగా నీ ధర్మము అని అన్వయము,గా కలిగినవాడా!
ప్రాతఃకాలమున అరుణకాంతులతో శోభిల్లువాడా! ఈ భూమండ లమును వెలుగుతో నింపువాడా! క్రేణి అనగా అత్యున్నత పదముపై నిలచి కాంతిని విరజిమ్మువాదడా !దుర్జనులను, అరణి అనగా దగ్ధము చేయు గుణము కలిగినవాడా!ప్రభాతమణిగా ప్రశస్తి చెందినవాడా!వేదవేదాంతులకు శిరోమణిగా విలసిల్లువాడా!, సకల వేద శాస్త్రాధ్యయనమును హనుమంతులవారు ఈయన వద్దనేకదా చేసినది, నమస్సులు స్వామీ!
హే జగన్నాయకా! జనమునకు మేలుచేయువాడా!గోగణము అనగా కిరణముల సమూహమును కలిగినవాడా!వంచన పరులను వారిని హింసించువాడా!ప్రపంచములోనిఏదో ఒక భాగములో ప్రకాశించుతూ ఉండేవాడా!నిదాఘము అనగా మండే ఎండలకు కారణమైన వాడా! నిత్యారోగ్యమును కలకాలమూ ప్రసాదించువాడా! నమస్సులు స్వామీ!
చెరుకు రామ మోహన్ రావు
Comments
Post a Comment