పెద్దల మాట

 పెద్దల మాట

https://ajaraamarasukthi.blogspot.com/2024/09/blog-post_16.html

ఏకేనాపి సువృక్షేణ పుష్పితేన సుగన్ధినా ।
వాసితం తద్వనం సర్వం సుపుత్రేణ కులం యథా ॥
ఉద్యానవనమంతా అనేక రకాలైన చెట్లతో నిండియున్నప్పటికీ అందులో ఏదేని ఒక చెట్టు సుగంధ భరితమైన పుష్పాలతో విరబూసినచో, ఆ సుమనోహరమైన సువాసనలు వనమంతా వ్యాపించి ఆ పరిసర ప్రాంతమంతటినీ ఆహ్లాదపరచే వాతావరణాన్ని కలుగజేస్తుంది.
ఇదే భావము కలిగిన ఈ వేమన పద్యము చూడండి.
కులము లోన నొకడు గుణవంతుడుండిన
కులము వెలయు వాని గుణము చేత
వెలయు వనములోన మలయజంబున్నట్లు
విశ్వదాభిరామ! వినుర వేమ!

కులములో ఒక వ్యక్తి గుణవంతుడన్నట్లయితే ఆ కులమంతా అతనివలన గౌరవాన్నిపంచుకొంటుంది. వనములో ఒక్క మంచి గంధపు చెట్టు ఉన్నప్పటికీ ఆ వనమంతా వాసన వెదజల్లుతుంది.


తెలివితేటలు, సత్ప్రవర్తన, ధర్మ పరాయణత్వము, పరోపకార బుద్ధి కలిగిన సకల విద్యాపారంగతుడు అయినట్టి, సర్వలక్షణ శోభితుడైనట్టి సుపుత్రుడు కలిగినచో ఆ కుటుంబము అంతా ఎంతగా శోభించునో ఎంతగా వృద్ధి చెందునో, ఆ వంశానికి ఎంత పేరు ప్రఖ్యాతులు వస్తాయో అదే విధముగా సుగంధ పరిమళ భరితమైన ఒక్క పుష్పించిన చెట్టు వలన వనమంతా ఆహ్లాద భరితమౌతుంది. ఆ వనములో సంచరించే వారందరికీ మనోల్లాసాన్ని కలిగిస్తుంది. ఈ సందర్భముగా నేను వ్రాసిన ఈ పద్యమును గమనించండి.
చందన సాలమ్ము చక్కగ ఒకటున్న
వనము నింపు గాలి వాసనిచ్చి
గంధ భూజ వనమ్ము కలిగినచో గాలి
దూరతీరములకు తోలు సురభి.
ఒక శ్రీగంధపు చేత్తుంటే ఆ సువాసనను, గాలి వనమంతా విస్తరింపజేస్తుంది. మరివానమే శ్రీగంధపు చెట్లతో నిండినచొ, సువాసన దూరతీరములకు కూడా వ్యాపించును, అదేవిధముగా కులమే సత్ప్రవర్తన కలిగిన వ్యాకులమే ఉండక వారి ప్రశస్తి దేశ దేశాంతరాములకు వ్యాపింపజేయును.
స్వస్తి.